تقييم الدبلومة

بصراحه شهاده والسلام انما شوفو الفرق بين دبلومه اسكندريه ودبلومه شبين هتلاقو فرق كبير جدا

هايل الردود دي ولسه مستني كمان
وشكرا لكل اللي ردوا

محتاجه تنظيم اكتر وبعض مواد محطوطه تقريبا زياده على المناهج وحشو وخلاص محتاجه تتشالبس هى سهله وبصراحه كفايه تعاون الكداتره معانا وتسهيلهم علينا حاجات كتير

المفروض فعلا نشكر الدكاتره على اللى بيعملوه معانا

من رايي ان مش دي المواد المهمه دراستها في الدبلومه فين البارا مثلا ؟؟؟؟؟؟؟؟؟؟؟
ايه لازمه الاحصاء؟

بصراحه الحاجه اللى بجد المفروض تبقى فى الدبلومه دى هى الشغل العملى لا كل اللى اخدناه نظرى هو طبعا مهم ومفيد بس لو كان عملى كان يبقى احسن وبعدين صح ماده الاحصاء دى ايه لازمتها للى مش ناوين بعملوا ماجيستير

الدبلومة كويسة بس يهتموا بالشغل العملى لان المفروض نبقى خارجين من الدبلومة قادرين نشيل شغل معمل
بس للأسف كعادة الدراسه فى أغلبية جامعات مصر لا تهتم بالشغل العملى (دراسه نظرية بحته)

انا ارى ان هناك عدم تنظيم وعشوائية فى القرارات ومواعيد الامتحانات بالاضافة الى الاتى
وجود مواد الاحاسب والاحصاء والانجليزى
غياب مواد مهمة فى التحاليل مثل البارا
بعض الاساتذة ليسوا على المستوى المطلوب ولم نستفد منهم شيئا
التكلفة عالية جدا مقارنة بالجامعات الاخرى
القصور الشديد فى الجانب العملى وان كان هذا يرجع الى الاعداد الكبيرة
هذا ولا يقلل ما قلت من شأن الدبلومة مقارنة بدبلومات اخرى
فهى تشبه الى حد ما دبلوم اسكندرية مع الاختلاف فى المستوى

انا من رأى يا جماعه ان مواد زى اللغه والكمبيوتر من الجاحات المهمه هاقولكم ليه ؟
احنا بعمل الدبلومه دى ليه ؟ المفروض اننا بنعملها عشان نشتغل فى التحاليل بصفه عامه
انا كنت فاكره ان الدبلومه هاتفيدنى وهافهم حاجه فى المجال دا ومانكرش انى استفدت شويه من النظرى لكن شغل عملى اكيد لااااااا
الواحد لما احتك فى مجال الشغل وخاصه لو معمل كبير اهم حاجه عندهم سحب الدم حتى لو انت اللى موش هاتسحب
ثانيا بتعرف لغه كويس ولا على اد حالك
ثالثا ليك فى الكمبيوتر وتفهم فى برامج زى ايزى لاب وتعرف تصمم وتكتب تقارير للتحاليل ولا لاء
موش بس كدا اللى حابب يكمل فى ماستر او دكتواره دى شىء مهم جدا واللى بيجضروا فى تمهيدى طب برضه بياخدوا لغه وكمبيوتر زينا
يمكن اللغه والكمبيوتر اللى درسناهم بتوع اعدادى مثلا موش على اد المستوى
لكن صدقونى كتعليم الاتنين دول من اهم الحاجات لو تسمعوا عن هيئه فولبرايت للمنح العلميه كان فيه فرصه ادامى اخد البكالريوس من هناك لكن كان فيه مشكله موش معايا تويفل
ولا معايا مؤهلات اهم دراسات عليا اون لاين
لكن مشكله الدبلومه ان بعض المواد غير مدوس محتواها العلمى ومدى الاستفاده منه على المدى البعيد موش تحاليل دم وبول وازاى تشتغل على جهاز لاء كمستقبل اكتشفت ان الدبلومه مالهاش اى استفاده حقيقيه وانا اسفه انى بقول كدا
والفلوس كمان مشكله يعنى الواحد كان خد كورس فى تعليم سحب الدم واشتغل من امبارح موش النهارده حتى لان اللى بيعرف يسحل اهم مليون مره من اللى بيعرف يتشغل تحاليل

ميرسي جدا ياجماعة على الردود دي
وأخص بالشكر د / أحمد وجيه
وننتظر المزيد من الردود والمشاركات
بالرغم من أن معظمها سلبية ولكنها قد تفيد
وعندي سؤال مهم :
" هو مفيش حد شايف ان الدبلومة مفيدة خالص ؟ "

هو فعلا زى مابتقولى يادكتوره بس انتى شايفه ان المواد دى كانت على المستوى اللى انتى بتتكلمى عنه واستفادتى منها فعلا

انا بقول ايه ؟ ماحدش فهم كلامى صح انا بقول ان المادتين مهم جدا جدا لكن المحتوى الدراسى منهج اعداى موش دراسات عليا ابدا
يعنى قصدى انهم موش اد المستوى العلمى ولا حتى ممكن نكون استفادنا منها

يا دكتور مادو الميزه الوحيده فى دبلومه شبين الكوم انها سهله مقارنه بالدبلومات الاخرى فى الجامعات التاني
والدكاتره متعاونين لدرجه كبيره

معاك حق دكتور مصطفى

السلام عليكم ورحمة الله وبركاته
السادة الزملاء اولا انا مش عايز اقول ان كل حاجة ف الدبلومة سلبية لا ولكن اكيد في ايجابيات ويمكن نكون مش واخدين بالنا منها
بس هي في مشكلة كبيرة وكلنا بنعاني منها ودي مشكلة مجتمع واحنا هنا المفروض نتكلم بصراحة والكل يعبر عن وجهة نظره
والمشكلة دي هي لو احنا سألنا نفسنا هو التعليم عندنا اصلا معناه اية ؟ حنلاقي الرد موجود في نصيحة مدرس لتلامذته ف الفصل او دكتور في محاضره وأكيد سمعناه علي مدر سنوات تعليمنا وهو ان لو السؤال دة جه ف الامتحان نعمل اية ؟
يبقي المشكلة اننا بنتعلم عشان نحل ف الامتحان وبعدين يحلها ربنا ولان التعليم عندنا مش تراكمي يعني اللي درسناه وامتحنا فيه في الترم الاول خلاص وكل سنة وانت طيب وعقبال الترم التاني
حنلاقي نفسنا مش بنستفيد وان ما كانش كلنا
فاللي حاصل ف الدلومة اساسه موجود من زمان جدا وفي كل مكان
وكمان نقطة الفلوس والاسعار دي والكتب
كما اذكر تعبير ذكره بعض اعضاء هيئة التدريس ف الدبلومة ف الترم الاول وهو بالنص ان انتو محتاجين ورقة بس وهتاخدوها
وفعلا والله العظيم انا سمعت رد تاني من دكتور فاضل ف الترم الاول وكنت بتكلم معاه وجها لوجه خارج المدرج وقال بالنص انتوا دفعتوا فلوس كتير قوي اكتر من اللازم وما تقلقوش هتاخدوا الورقة اللي انتوا محتاجينها
والله المستعان

بصراحة يا جماعة اسواء حاجة فى دبلومة شبين هى العملى انا خدت الدبلومة فى تانى دفعة ليها وكانوا دايما فى البداية بيبرروا ان الدبلومة غالية بسبب الاجهزة اللى بيشتروها عشان نتعلم عليها العملى المظبوط وان الاجهزة غالية لكن للاسف قعدنا نستنا الاجهزة لحد اخر السنة وماجتش وما اظنش انها هتيجى للاسف العملى فيها حاجة على قد الحال مقرنة طبعا بغلو تمنها ولكن بجد الكويس فيها تعاون الدكاترة مش كلهم طبعا كانو متعاونين لكن فى منهم سيجزيهم اللة خير الجزاء باذن اللة وشكرا .

دبلومة شبين بتاخد مبلغ انتو شايفين انة كبير ولو انة بصراحة مبلغ مش كبير ولا حاجة بكرة لو اتقفل الترخيص هتدفعو قد المبلغ دة 100 مرة عشان تعرفو تاخدو حقكم احنا دفعنا فى الكلية قد المبلغ دة فى الكتب والشيتات والملخصات وبعدين ما باقى الدبلومات فى اسكندرية مثلا بتاخد مبلغ قريب من كدة لكن الفرق هنا ان النجاح مضمون وبتقدير كمان لكن فى الجامعات التانية هتدفع وبرضة ممكن تشيل وتدفع تانى وكمان الدكاترة واللة ربنا يكرمهم بيساعدونا بكل الطرق وبيدو تقديرات كمان عاوزين اية تانى وبعدين اللى عايز يتعلم تعليم كويس فى جامعات معروفة ان مستواها كويس ما قدمش فيها لية زى اسكندرية والقاهرة وغيرهم احنا هنضحك على بعض كلة دخل شبين عشان مضمون النجاح وكمان الحضور قليل والعملى احنا يعنى كنا استفدنا اية من عملى الكلية واللى عايز يتعلم يتدرب برة فى معمل خاص واللة مفيش كلية هتكفى العدد الكبير دة ومحدش يقولى لية يقبلو العدد الكبير دة لان دى تبقى انانية يعنى انا جايب تقدير قليل ولو ماكنتش شبين بتقبل العدد الكبير دة مكنتش عمرى هعرف اقدم فى اى دبلومة وبصراحة بقى انا عاجبنى نظام الدبلومة على كدة يعنى ادفع وانجح واخلص وبعدين انا اتعلم الشغل بقى على حسابى يعنى اللى عايز يتعلم بعد كدة يقدم فى الكليات اللى مستواها كويس وكلنا عارفينها واللى عايز عملى يتعلم برة على حسابة وكمان موضوع الشيت دة دكتور الهورمونات مثلا قال اللى مش عايز يشترى الشيت ممكن يمتحن شفوى الفرصة متاحة يعنى مفيش اجبار واللة الشيت دة نعمة احنا كنا بنشترى شيت فى كل مادة وبرضة كنا بناخد درجة اعمال السنة على الشفوى يعنى حتى اللى مذاكر ماكنش بيعرف يجاوب يبقى كدة احسن ولا لا يعنى شيت ممكن تحلية من الكتاب او تنقلية من زمايلك احسن ولا امتحان شفوى ولا امتحان اعمال سنة كل شوية بصراحة انتم كدة بتتبطرو على النعمة يعنى ياريت اللى مش عاجبة يبقى يشوف حال الدبلومات التانية ويعرف النعمة اللى هوة فيها

على فكرة انا عندى صاحبيتى راحت جامعه اسكندريه عشان تاخد الدبلومه من هناك وقلتانا ان الدراسه عاديه هناك مش صعبه زى ما احنا فاكرين بس الحلو اللى هناك هو العملى فقط وبالنسبه للفلوس 1500 وهى 3 تيرم بس كل حاجه هناك بالفلوس يعنى تروح تيجيب رقم الجلوس تدفع 10 جنيه و كذالك الكارنيه تدفع فلوس وهكذا و الكتب طبعا بفلوس يعنى اللى هتوفروه باليمين هيتاخد بالشمال بس الفرق انت فى شبين بتنجح ونسبه السقوط عاليه فى اسكندريه وفى الاخر هى شهاده وخلاص وشكرا

هما دول بس اللي حضروا الدبلومة ولا ايه
فين المشاركات ياجماعة
لازم نكون فكرة عامة على الدبلومة دي
ونوضح رأينا للجميع