من اجمل ما قرأت (( الجزء الثاني ))

من اجلها


نظرتُ اليها من بعيد حيث تقترب.. انها تقترب.. حتى وقفت أمامى.. كم كنت أعشقها وكأن بينا حبا قديما.. انها الحافلة التى استقلها الى بيتى بعد انتهاء عملى.. صعدت اليها وكعادة كل يوم اضطررت الى الوقوف
*******
بدأت الحافلة تتحرك ويهتز جسدى معها.. وكم تغمرنى تلك السعادة حين أرى ذلك المزيج من الركاب بصورة يومية وما يدور من مناقشات ملتهبة
هناك من يحدث من بجواره ويعلو صوته: الدنيا نار.. كل حاجة نار.. هنعمل أيه.. نبيع ولادنا عشان نكمل الشهر
ويضرب بكفيه, والأخر يسمعه فى حزن.. ولايرد سوى بجملة واحدة: احنا لنا ربنا.. وتستمر المناقشة
أقلب بعيونى.. وأنظر الى أخر يجلس بجوار نافذة الحافلة.. انه شاب وسيم ينظر الى النافذة ولايحرك ساكنا.. يبدو أن همومه أحمالا هو الآخر
تتحرك عينى الى تلك الفتاة بجوارى التى تهمس فى هاتفها مبتسمة: مش هقولك الا لما تحول لى رصيد.. ثم تواصل حديثها
أدركت وكأننى أقلب قنوات التلفاز حين وجدت من يقرأ الصحيفة.. وهناك من يجادله: الاهلى أقوى.. والثانى: لأ.. الزمالك أقوى
*******
لم يثر فضولى أي من تلك المناقشات.. فأنها صورة تتكرر أمام عينى يوميا, ولا أجد فيها الجديد.. حتى خرجت من ابتسامة حين وجدت ما هو مختلف.. انهما اثنان.. شاب وفتاة.. يجلسان متجاورين.. كم كانا فى انسجام عجبت له
ظللت أرقبهما وأتابع تلك البسمات المتبادلة.. وللعجب لا يحدثان بعضهما.. انهما يشيران بأيديهما.. أدركت أنهما لا يمتلكان القدرة على الكلام.. انهما أبكمان
من ينظر اليهما ويرى تلك الابتسامة التى تعلو شفتيهما يدرك أنهما فى عالم آخر.. لا يهتمان بما يشعر به باقى الركاب
كم كانت ابتسامته جميلة وابتسامتها أجمل حتى جذبا انتباه باقى الركاب.. وكأنهم شعروا بالغيرة من تلك السعادة التى تغمرهما
*******
بعدها وجدت من كان يتحدث عن الغلاء قد سكت.. وبدأ يرقبهما فى هدوء وعلت وجهه ابتسامة.. ومن كان يتحدثان عن كرة القدم صمتا.. وظلا يتابعان حركات أيديهما المتناسقة.. حتى ساد الحافلة صمت غريب.. واكتفى الركاب بمشاهدتهما.. ومع هذا لم يهتما بأى شئ من حولهما وواصلا مناقشتهما التى لا يفهمها غيرهما
تعجبت كثيرا لهذا.. كيف استطاعا أن يجعلا من هؤلاء الناس أشخاص أخرى تنسى همومها ولو للحظات.. وكانت اجابتى لنفسى.. اننا نادرا ما نجد لحظات جميلة
*******
حتى وقفت الحافلة وهمت الفتاة لتغادرها.. وكم كانت لحظة وداع رائعة.. تشير بأيديها باشارات أدركت بها كم تحب هذا الشاب.. لا تأبه بما يحيطها من نظرات الناس.. وهو الأخر أدركت من عينيه كم يحبها
نزلت الفتاة.. ووجدت مكانها خاليا فاتجهت اليه وجلست بجوار الشاب.. ولكننى لسوء حظه أننى لن استطيع أن أضيع ملل طريقه.. ولا استطيع أن أتحدث معه
حتى فوجئت به يسألنى: لو سمحت الساعة كام؟
نظرت اليه فى مفاجاة: انت بتتكلم؟!!
هز رأسه: ايوة
شعرت بالاحراج: أنا افتكرتك
قاطعنى الشاب فى ابتسامة: أخرس؟
مازلت فى دهشتى: أيوة.. والناس دى كلها فكرتك كدة
صمت الشاب مجددا ولم ينطق بعدها.. حتى وقفت الحافلة مرة أخرى واستعد لمغادرتها.. ثم نظر الىّ فى ابتسامة: أنا اتعلمت لغة الاشارة عشانها
..ثم غادر الحافلة

منقووووووووووووووووول

هى فعلا مفاجئه
بس فعلا عجبنى فيها اوى عنصر التشويق
وبعدين كمان القصه جميله اوى انها مزيج من عناصر كتير
ومواضيع متعدده
وكمان جميل اوى اختيار حضرتك لها دكتور على
انها تكون
الجزء التانى لموضوع
من أجمل ما قرأت
شكرااااااااااااا دكتور على تميز حضرتك الدائم

قصة جميلة وشيقة وتعطي معاني كثيرة
مشكور اخ علي

شكرا يا د. علي

يا د.علي احنا بالتاكيد زملا
ومش عاوز حضرتك تزعل مني انا لما شوفت ان حضرتك
مشرف قسم المواضيع الترفيهية قولت ان حضرتك مش هتزعل من هزاري
وانا حصلي الشرف ان حضرتك تقبل هزاري
وبالنسبة لكلامي مع د.علا ود.هيثم دا كان مجرد هزار والله وانا اسف جدا
وطبعا حضراتكم مشرفين وعارف ان الموضوع لو جد هنطرد من المنتدى
وبعتذر لحضراتكم كتير عن اي حاجة قولتها تزعل حضراتكم
وبتمنى دايما أكون عند حسن ظن حضراتكم
وبعتذر لإدارة المنتدى جداً

دكتور علي
يالها من قصة حقا رائعه تنم عن مدى جمال ذوقك الرفيع لانها تدل على الحب الحقيقي الذي جعل من الحبيب يصنع الصعب من اجل محبوبته وهذا قل في هذا الزمان والعجيب ان هذا الصعب قد يقلل من مكانته في بعض نظر الناس وهذا هو الاجمل

بجد قصه جميله جدا ولها معنى اجمل ازاى الانسان ممكن يعمل الصعب ويغير من نفسه علشان اللى بيحبه
ودا بيكون دليل على ان الحب حقيقى
شكرا ليك ياعلى على القصه الجميله دى

امممممممممممم القصه حقيقى مش صعب ان الواحد يتخيلها او انه ميصدقش انها حقيقيه لان فعلا الحب موجود بس هو بيختلف من مفهوم شخص للتانى واحساس شخص بالتانى يعنى فى ناس بتفكر بعقلها اكتر من قلبها وفى العكس
انا معجبه باختيارك ومشاركتك بقصه جميله زى دى بتأثر فى اللى يقراها وتطور مفهوم الحب عنده
وانا لاحظت كلامك فى مفهوم الحب فى اكتر من مشاركه ليك على النتدى وتعليقاتك قد ايه جميله
وفى انتظار المزيد من مشاركتك

بجد اختياراتك دايما رائعه دكتور على
الحب الحقيقى بجد هو انك تتمسك بالانسان اللى انت بتحبه ومتبيعهوش لاهون سبب
يعنى مثلا بيحصل كتير مع البنات انها تلاقى الحب الحقيقى فعلا اللى ممكن يسعدها طول عمرها وتسيبه وتدور على الماده والفلوس والعيشه المرتاحه
بجد لو فكرت لحظه هتعرف ان العيشه المرتاحه هى العيشه ولو يوم واحد بجوار الحبيب
معلش لو فى فى كلامى شئ مع عدم الواقعيه بس انا شايفه كده بصراحه
وفكره التغير فى القصه انك تتغير عشان الانسان اللى بتحبه هى فكره فى حد ذاتها صعبه الحدوث انما لو حصلت فيبقى هو دا الحب فعلا
شكرا دكتور على على القصه الجميله